Америкийн Засгийн газраас ногдуулсан 16,4 сая долларын торгуулийг “Toyota Motor” нэгтгэл төлөх бодолтой байгаа тухай тус улсын Засгийн газрын нэрээ хэлэхийг хүсээгүй түшмэдийн мэдээллийг иш татан Франс Пресс агентлаг уламжлав.  

Үйлдвэрлэсэн машиныхаа шатахуун дамжуулах механизмын гэмтлийн тухай Америкийн эрх баригчдад цаг тухайд нь мэдэгдээгүй учир тус улсын Тээврийн яам энэ сарын эхэнд автомашин үйлдвэрлэдэг компанид ногдуулсан хамгийн их хэмжээний мөнгөн торгууль буюу 16,347 сая долларын торгуулийг  “Toyota Motor” нэгтгэлд ногдуулсан юм. 

Хэрвээ “Toyota Motor” нэгтгэл торгуулийг төлөхөөс татгалзвал АНУ-ын Засгийн газар тус компанийн эсрэг шүүхэд зарга мэдүүлэх бодолтой байна.

2009 оны хоёрдугаар хагасаас “Toyota Motor” нэгтгэл дээрх гэмтэлтэй холбогдуулан дэлхийн зах зээлээс “Corolla”, “Camry”, “Avalon” загварын машинуудаа татаж эхэлсэн бөгөөд өнөөдрийн байдлаар АНУ-ын зах зээлээс 2,3 сая автомашин эргүүлэн татаад байна.

МОНЦАМЭ

Америкт жилд 17 сая шинэ автомашин зарагддаг. Гэтэл тав болон түүнээс дээш сараар дараалалд зогсон байж авдаг машин байдаг. Үүний нэг нь саяхан дуулиан дэгдээсэн “Тоёота” компанийн шинэ маягийн эрлийз машин болох “Тоёота Приус”загварын машин  юм.

Энэ машин дотоод шаталтын хөдөлгүүрийн зэрэгцээ аккумулятороор ажилладаг цахилгаан хөдөлгүүртэй бөгөөд байгальд хор хөнөөлгүй гэж тооцогддог тул нэртэй улс төрчид, алдартнууд 2005 онд худалдаанд анх гарахад нь их сонирхож байжээ.  Холливудын од Леонардо Ди Каприо тухайн үеийн Тоёотагийн “Пруис” загварын хоёр автомашинтай байжээ.

Японы авто машин үйлдвэрлэлийн “Toyota” компанийн Америк дахь салбарын тэргүүн Жеймс Ленц зарим нэг машин нь яагаад гэнэт, ямар ч удирдлагагүйгээр хурдлах болсны шалтгааныг өнөөг хүртэл тогтоож чадахгүй байгаа гэдгээ хүлээн зөвшөөрчээ.Ленц АНУ-ын Конгрессийн комиссын өмнө үг хэлснээр “Toyota” компани дэлхий даяар тарсан найман сая машинаа эргүүлэн татаж, энэхүү гэмтэл цахилгааны гэмтэл үү, эсвэл зүгээр л механик саатал уу гэдгийг тогтоохоор ажилласаар байгаа аж.

Эдгээр автомашинд гарч байгаа гэмтэл дор хаяж найман хүний үхлийн шалтгаан болж, Америкийн олон нийтийн дунд багагүй дургүйцлийг төрүүлээд байна.

Жеймс Ленц мөн “Toyota” компани өөрийн өмнө тавьдаг өндөр стандартаа хангаж чадсангүй гэдгийг хүлээн зөвшөөрлөө. Тэрбээр Конг ресст тайлбар өгөхөөр тус компаниас дуудагдсан анхны дээд албан тушаалын хүн болж байгаа юм.

Өнөөдөр Америкийн хууль тогтоогчдын өмнө “Toyota” компанийн ерөнхийлөгч Акио Тойода тайлбар өгөх аж.

Ноён Тойода саяхан гаргасан мэдэгдэлдээ өөрийн биеэр компанийнхаа автомашины аюулгүй байдлыг хариуцдаг гэдгээ онцолжээ. Мөн компанид үүсээд байгаа асуудал, бэрхшээлүүд түүний хэрэглээ хэтэрхий хурдан өсч байгаатай холбоотой гэсэн байна.

”Toyota”-гийн бүх машин миний нэрийг зүүдэг. Тэгэхээр манай машинуудад ямар нэгэн юм хэвийн бус болоход энэ нь яг л надтай тохиолдож байгаа юм шиг санагддаг. Манай компанийн үйлдвэрлэсэн машинууд хамгийн аюулгүй байхыг би хэн бүхнээс илүү хүсч байна” хэмээн тэрбээр мэдэгджээ.

Калифорнид эхнэр, охины хамт амь үрэгдсэн Марк Сэйлорын гэр бүлийнхэнд Японы автогигантын тэргүүн өөрийн биеэр эмгэнэл илэрхийлж, уучлал гуйсан байна. Сэйлор “Toyota” компанийн машин жолоодож явжээ.

Үүнээс гадна “Toyota”-гийн тэргүүн өөрийн үйлдвэрийн гэмтэлтэй машинуудыг хурдан хугацаанд эргүүлэн татаж аваагүй гэдгийг хүлээн зөвшөөрсөн байна.

Нийгмийн толь

Лос-Анжелест болдог авто шоуны өмнө автомашин үйлдвэрлэгчдийн дизайнерүүдийн тэмцээн болдог уламжлалтай. АНУ-д машин худалддаг бараг бүх томоохон корпорацуудад Калифорнид дизайны товчоо байдаг. Энд дэлхийн өнцөг булан бүрээс авьяас билэгтнүүд цуглаж америкаар зогсохгүй дэлхий нийтийн зах зээлд зориулсан загваруудыг бүтээж байдаг. Санхүүгийн хямралаас болоод энэ оны “Youth mobile 2030″ үзэсгэлэнд тэд тэр бүр шинэ загваруудтайгаа оролцож чадсангүй. Энэ оны дизайнерүүдийн сэдэв нь 2030 оны залуусын хөлөг гэсэн сэдэв байсан бөгөөд Audi, GM, Honda, Mazda, Nissan болон Toyota корпорацууд өөрсдийн загвараа танилцуулсан байна. Хөгжингүй орнуудын залуусын амьдралд өнөөдөр автомашин ихээхэн үүрэг гүйцэтгэх болж, автомашин нь тэдний өөрийгөө илэрхийлэх имиж нь болж, найз нөхөдтэйгээ харьцахад нь ихээхэн чухал болсон байна. Улам хурдан өөрчлөгдөж буй харилцаа холбооны хэрэгсэл ирээдүйн тээврийн хэрэгслийг ч ихээхэн өөрчлөх төлөвтэй. Шинэ үеийнхэн маань гартаа гар утастайгаа, онлайн найзуудтайгаа вебкамерийн хяналтан дор өсч бойжиж байна. Орчин үеийн харилцаа холбооны технологи нэвтрээгүй загварын машинууд бол тэдний хувьд үеэ өнгөрөөсөн музейд тавигдвал зохих эд ажээ. General Motors Advanced Design тавчооноос компьютерийн автомашины уралдаанд ялсан залууст л машин барих эрх олгох нь зүйтэй гэсэн санал гаргаж байна. Уг сургуулилтын автомат нь эхлэн суралцагсадыг удирдан авч явж зогсоолд нь хүргэх ба улмаар дадлагажин бодит байдалд ихээхэн ойр замд ур чадвартайгаар эцсийн зогсоолд хүрч чадаж буй тоглогчидод л машин жолоодох эрх олгодог болох ажээ.

Калифорни дахь Honda Research and Development төв нь хүний геномыг ашиглан хувийн машиных нь хэлбэрийг тодорхойлохоор мөрөөдөж байх юм. Honda Helix нь жолоочтой “холбогдоод” тухайн биеийн параметрүүдийг судалсаны үндсэн дээр машины “хэлбэрээ өөрчлөгч полимер”-ээр бүтсэн салоныг тухайн хүнд тохирох A, B эсвэл Z хувилбаруудаас тохирохыг сонгон хэлбэрийг нь өөрчилдөг болох ажээ.

Nissan Design Америка товчооны дизайнерүүд арай илүү бодитой төсөл хийжээ. Тэд ирээдүйн машинуудыг GRID гэж нэрлээд буй цахилгаан замаар явна гэж үзжээ. Байгаль орчинд халгүй энэ машинууд хэрэглэгчийн янз бүрийн хүсэлт шаардлагаар өөр өөр загвартай байх гэнэ.

Mazda R & D of North America товчоо нь цахилгаан хөдөлгүүр болон раамтай Mazda Souga машиныг 2030 онд үйлдвэрлэх ажээ. Машины гадаад хэлбэрийг хэрэглэгчийн хүсэл сонирхлоор бүтээнэ. Залуус тусгай сайтаас эдний машины 3D загварыг татан авч өөрийн сонирхсон дизайнаар өөрчлөөд уг загвараа үйлдвэр лүү явуулж хүссэн машинаа хийлгэж болох болно.

Калифорнийн Volkswagen/Audi of America Design төв Audi: eOra ба eSpira гэсэн хоёр загвар санал болгож байна. Энэхүү машинуудын гол онцлог нь тэдний жолоодлого юм. Жолооч машинаа өөрийн биеийн хөдөлгөөнөөр жолоодож явах болно. Машины удирдлага хүний биеийн хөдөлгөөнийг маш соргогоор мэдэрч жолоодоход маш хялбар болж та хашаа машин тийшээ л яваад байх ажээ.

Toyota’s Calty Design Research товчооны зохиосон машин бол роликтой тэшүүр шиг л харагдах ажээ. Хувь хүн өөрт таалагдсан хэлбэрээ сонгож авах ба явж байгаад найз нөхөдтэйгээ тааралдвал хоёр машинаа холбож, хамтдаа явж болдог ажээ. 2009 оны 12-р сарын эхээр болох Лос Анжелесийн авто шоуны үеэр эдгээр “мөрөөдлийн машинуудын” ялагч нь тодрох ажээ.

Цаг төр сэтгүүл

Дэлхийн санхүүгийн хямрал автомашин үйлдвэрлэлд тун хүнд цохилт өгч тэдний өмнө шийдэхэд бэрхтэй хүндхэн асуудлыг босгож тавьсан. Daily Telegraph дэлхийн автомашин үйлдвэрлэлийн ирээдүйг тодорхойлогч нөлөө бүхий таван хүнийг дараахи байдлаар тодорхойлжээ.

Грэм Акио Тойода

Дэлхийн автомашин үйлдвэрлэлийн хамгийн том компани Toyota-гийн ерөнхийлөгч Акио Тойода өөрийн стратегийн бодлогоороо ер нь дэлхий дахины үйлдвэрлэлийн хөгжилд асар их нөлөөтэй шийдвэрүүдийг гаргаж байдаг хүн. Тойода бол компанийг үндэслэгчийн ач хүү бөгөөд сүүлийн 14 жилд анх удаа энэ гэр бүлээс тус компанийг тэргүүлэх болсон билээ. Хэдийгээр тэр тавь гарч яваа насны эр боловч Японы хувьд ийм өндөр албан тушаалд бол их залууд тооцогддог. Тойода нь Morizo нэрээр блог хөтөлдөг, Германы нилээд дуулиантай 24 цагийн Нюрбургринг авто уралдаанд оролцох зэргээр бизнесмэнүүд дундаа нилээд содон хүн юм.

Ерөнхийлөгчийн албан тушаалыг хүлээж аваад анхны хэлсэн үгэндээ л “Намайг үүнд оролцохоо боль гэж олон хүн хэлдэг л дээ. Гэхдээ энэ уралдаанд миний оролцох хэд хэдэн шалтаг байдаг юм аа. Нэгдүгээрт энэ бол Нюрбургринг уралдаан, хоёрдугаарт энэ бол 24 цаг болдог тэмцээн, гуравдугаарт энэ бол машин бүтээхтэй нягт холбоотой зүйл” гэж ярьсан байна. Toyota-д ажиллах нь түүний хувьд хүндхэн асуудлуудтай учирсан. Компани өөрийн хөгжлийн 72 жилийн түүхийн хамгийн бэрх хэцүү хямралыг давах болсон хүнд үед тэрээр удирдлагыг гартаа авсан. Энэ оны гуравдугаар сард тус компани түүхэндээ анх удаа жилийн орлого нь 437 тэрбум йенээр буурсан билээ. Йений ханш өсч байгаа болон хамгийн ашиг ихтэй зах зээл болох АНУ-д хэрэглээ буурч байгаагаас энэ онд борлуулалт 8,97 саяас 7,3 сая болж бууран ахин унана гэж Тойода тооцоолж байгаа ажээ.

Toyota компанид “аврал хэрэгтэй болоод байна” гээд “сураггүй алга болох бүр сөнөх ч аюул ойрхон байна” гэж Тойода мэдэгдэж байгаа. Иймээс “Бид хэрэглэгчдээ сонсож, хамгийн сайн машин үйлдвэрлэх ёстой” гэж тэр мэдэгдэж байна.

Ерөнхийлөгч Барак Обама

АНУ-ын ерөнхийлөгч Обама Chrysler болон General Motors компаниудын бүтцийн өөрчлөлтийг дэмжээгүйсэн бол дэлхийн автомашин үйлдвэрлэл өдийд нилээд өөр болох байлаа. Сайн болсон уу муу болсон уу гэдгийг одоо хэлэхэд эрт байгаа ч Обама “автомашины хаан” Стив Раттнерийг ажиллуулснаар бага оврын машин үйлдвэрлэдэг Дорныхон хүч түрж эхэлсэн үед АНУ-ын үйлдвэрлэлийн хүчин чадлыг хадгалж үлдэж чадсан билээ.

АНУ-ын сангийн яам шинэчлэгдсэн General Motors-ын 60%-ийг өмчилж, бизнест нь 50 тэрбум долларын хөрөнгө оруулж, компанийн захирал Рик Вагонерийг авч хаясан. Харин Chrysler 10 гаруй тэрбум долларын зээл авч Fiat компанитай нэгдсэн билээ. Серджио Маркионне Италийн Fiat нь дэлхийд бүү хэл европын хамгийн том машин үйлдвэрлэгч биш боловч түүний захирал Сарджио Маркионнегийн хүчин чармайлт, шийдмэг тэмүүллийн ачаар олны анхаарлын төвд ороод байгаа юм. Хэзээ мөдгүй дампуурахдаа тулаад байсан тус компанийг тэрээр таван жил толгойлохдоо бусдыг өөртөө нэгтгэн улам хүчирхэгжиж буй аж үйлдвэрлэлийн тэргүүлэх зэргийн шилдэг компанийн нэг болгож чадсан юм.

Fiat нь Chrysler компанийн хувьд “аврагч ханхүү” болсон бөгөөд бүр давраад Opel болон Vauxhall компаниудыг худалдан авах санал тавьж байв. Гэвч Маркионне үйл явдал нэг л олон ангит кино шиг хөврөөд байна гэж мэдэгдэн энэхүү саналаасаа татгалзсан нь магадгүй зөв шийдвэр байсан биз. 2004 онд Маркионне удирдлагыг гартаа авах үед Fiat нь дөрөвхөн жилийн дотор 8 тэрбумын алдагдал хүлээгээд байсан юм.

2005 оноос компани ашигтай ажиллаж эхэлсэн. Маркионне бага оврын загваруудад гол анхаарлаа хандуулаад “Бид бол автомашин үйлдвэрлэгчид дотроо бол Apple харин 500 шинэ загвар маань iPod” гэж мэдэгдэж байв. Түүнийг Fiat компанийн чадавхийг хэтрүүлэн үнэлж байна гэж мэргэжилтнүүд үзэж буй боловч одоогоор гаргаад буй амжилт нь яах аргагүй олны анхаарлыг татаж байгаа юм. Тус салбарын ирээдүй бол дахин хуваарилалт болон бага оврын машин гэж Маркионне байнга яриад байгаа тийм болохоор шинэ шинэ нэгдлүүд бий болохыг үгүйсгэх аргагүй юм.

Алан Мулалли

Янз бүрийн улс орны хэрэглэгчдийн хувьд Ford бол хамгийн шилдэг машин хэвээрээ л байгаа. АНУ-ын бие даасан хамгийн том автомашин үйлдвэрлэлийн компанийг тэргүүлж буй Алан Мулаллийн амжилт нь дэлхийн зах зээл дэх барууны үйлдвэрлэгчдийн хүчний харьцаанд ихээхэн нөлөө үзүүлсэн билээ. Ford нь АНУ-д General Motors болон Chrysler компаниудын зах зээлийг улам бүр булаан авч, төрийн өмгөөлөл эрэлгүйгээр дампуурлын аюулыг зайлуулж чадсан хүчирхэг компани юм.

2006 оноос хойш 30 тэрбум долларын алдагдалд ороод байсан компани нь Мулаллигийн удирдлагаар гуравдугаар улиралд Хойд Америкт ашигтай ажиллаж чадсан ба 2011 он гэхэд дэлхий даяар ашигтай ажиллана гэж төлөвлөж байна. Мулалли бусад өрсөлдөгчдөөсөө илүү хурдан шуурхай ажиллаж Lehman Brothers дампуурахаас өмнө амжиж Jaguar, Land Rover болон Aston Martin зэрэг ачаанаасаа салж амжсан ба шатахуун бага зарцуулдаг машин сонирхох болсон хэрэглэгчдийн таашаалыг эрт мэдэрч энэ чиглэл рүү ажиллаж чадсан байна.

Ли Шуфу

Хятадын машин үйлдвэрлэгч хувийн хамгийн том компанийн тэргүүн тэрээр Хятадын Генри Форд гэгдэх болжээ. Хятадын зах зээлд түүний эзэлж буй байр суурь нь нөгөө талаар БРИК-ийн орнуудын машин үйлдвэрлэлийн байдлын тод жишээ болж байдаг.

Энэтхэгийн Tata Motors компани Jaguar, Land Rover-ийг худалдан авсан, Оросын “Газ” Opel компанийг худалдан авахаар хөөцөлдөж байгаа ба Хятад улсын зах зээл нь машин борлуулалтаараа АНУ-ыг ардаа орхисон бөгөөд Хятадын компаниуд барууны томоохон компаниудтай нэгдэх оролдлого хийх болсон.

Ли Шуфугийн Geely компани нь Лондонгийн такси үйлдвэрлэгч Manganese Bronze компанитай наймаа тохирсон ба Volvo-той тохирохоор оролдож байна. Geely нь хоёр зуун мянган машин л Хятадын зах зээлд нийлүүлдэг боловч Хятад болон бусад оронд маш түргэн өргөжиж байгаа юм.

Тус компани нь Гонконгийн биржид бүртгэлтэй бөгөөд Goldman Sachs 334 сая долларын хөрөнгө оруулалт хийсэн нь түүний нэр хүнд хэрхэн өсч буйн илрэл юм. Ли нь Хятадын хамгийн том баячуудын нэгэнд тооцогддог бөгөөд төрийн өмч давамгайлсан улсад түүний зарим нэг санаархал нь ихээхэн маргаан өрнүүлдэг байна.

“Автомашин үйлдвэрлэх нь хүмүүсийн бодоод байдаг шиг хэцүү асуудал биш болсон. Автомашин чинь дөрвөн дугуй, залуур, мотор л юм шүү дээ. Автомашин үйлдвэрлэлд хэрэглэж буй технологи асар их хөгжсөн. Шаардлагатай технологи, сэлбэг хэрэгсэл болон инженерүүдийг худалдан авах мөнгө надад хангалттай бий гэж бодож байна” гэж ярьдаг хүн дээ.

Цаг Төр сэтгүүл

Японы машин үйлдвэрлэлийн аварга компани Toyota өөрийн охин компани Daihatsu-тай хамтран 10000 доллараас бага үнэтэй суудлын тэрэг бүтээхээр ажиллаж байна. Энэ машиныг Бразил, Орос, Энэтхэг, Хятадын зах зээлд зориулан улс бүрийн онцлогоос болоод зарим нэг өөрчлөлттэйгээр бүтээж байгаа ажээ. БРИК орнууд (нэрсийн эхний үсгийн товчлолоор) гэж нэрлэгдэх эдгээр улсад энэ оны эхний зургаан сард АНУ болон Японы нийлснээс их машин борлогджээ. Аль болох өртөг хэмнэх үүднээс одоо Индонезид байгаа бензин бага зарцуулдаг машин үйлдвэрлэлээр төрөлжсөн Daihatsu компанийн үйлдвэр дээр угсрах юм.

Одоогоор сэлбэг нийлүүлэгч компаниудтай хэлэлцээ хийж байгаа бөгөөд үнийг одоогийн түвшнээс 30% хүртэл бууруулна гэж тооцож байна. Одоо Toyota компаниас гадна өөр хэд хэдэн компани энэхүү ирээдүйтэй зах зээл рүү орохоор шамдаж байна. Тухайлбал Өмнөд Солонгосын Huүndai болон америкийн Ford компаниуд бензин бага зарцуулдаг 5-8 мянган долларын үнэтэй суудлын машин худалдаанд гаргахаар ажиллаж байна. Энэтхэгийн Tata Motor компанийн Nano машин 2000 орчим долларын үнэтэй байгаа нь одоогоор хамгийн хямд машин болж байгаа. Toyota компанийн БРИК орнуудад гаргах загвар нь эдгээр машинуудаас ахиу үнэтэй байх боловч өндөр чанар, техник тоноглолоор энэ сул талаа нөхнө гэж тооцоолж байгаа ажээ.

Дэлхийн хамгийн том машин vйлдвэрлэгч “Тоёота” корпораци єнгєрєгч жилийн хугацаанд тvvхэндээ байгаагvй их алдагдал хvлээснээ зарлав. Хямралын шуурганд олон тэрбум ам.доллар алдсан “Тоёота” єнгєрєгч гуравдугаар сарын 31-нд дууссан санхvvгийн жилд 436.94 тэрбум иен буюу 4.4 тэрбум ам.долларын алдагдалтай ажиллажээ. Японы мэргэжилтнvvдийн тооцоогоор энэ жилийн алдагдал vvнээс ч их буюу 5.5 тэрбум ам.долларын алдагдал хvлээх гэнэ.“Тоёота” ажилчид болон бvтээгдэхvvнийхээ тоог цєєлж, хилийн чанад дахь зарим vйлдвэрээ хааж, тєрийн олон тэрбум иений тусламжид хамрагдсан ч худалдан авагчдын тоо буурсан нь ойрын хугацаанд єєрчлєгдєх тєлєвгvй байна.

Америкийн автомашин үйлдвэрлэгч их гурвалын нэг “General Motors” компани дэлхийн топ автомашин үйлдвэрлэгч гэх нэр хүндтэй цолоо 77 жилийн турш хадгалсны эцэст Японы “Toyota” корпорацид алджээ. “GM”, “Ford” болон “Chrysler” нарын хувьд 2008 он хүндхэн болж өнгөрсөн. Тэдгээрээс “GM” компанийн хувьд автомашины борлуулалт урьд өмнө байгаагүй хэмжээнд буурч, ирээдүйгээ аврахын тулд чухал арга хэмжээ авах шаардлагатай тулгарчээ.

CNN Money-гийн мэдээлж буйгаар тус компани 77 жилийн турш хадгалсаар ирсэн дэлхийн топ автомашин үйлдвэрлэгч гэх цолоо “Toyota Motor” корпорацид алджээ. Өнгөрсөн онд “GM” компанийн борлуулалт дэлхийн хэмжээнд 10.8 хувиар буурч, 8.36 сая автомашин борлогдсон бол “Toyota”-гийн 8.97 сая автомашин зах зээлд эзнээ олсон байна.“GM” компанийн борлуулалтын шинжээч Майк ДиГиованни хурлын үеэр хэлэхдээ “Дэлхийн борлуулалтын хэмжээгээр номер нэг байна гэдэг худалдан авагчдын хувьд чухал зүйл биш гэж бодож байна. Тэдний хувьд юу чухал вэ гэхээр хүчтэй, нэр хүндтэй брэнд, сайн бүтээгдэхүүн” гэсэн байна.

Харин “Toyota”-гийн хэвлэлийн төлөөлөгч Стивен Куртис “Дэлхийн номер нэг болох гэдэг бидний зорилго байсан. Чанар болон худалдан авагчдыг өөртөө татах тал дээр тэргүүлэгч байх нь чухал” гэжээ.Өнгөрсөн он авто салбарынхны хувьд хүндхэн жил болж, томоохон автомашин үйлдвэрлэгч компаниуд салбар үйлдвэрүүдийнхээ үүдийг барьж, үйлдвэрлэлээ багасгаж, орон тооны цомхотгол хийж, зарим нь бүр дампуурлын ирмэгт тулсан. 2009 онд ч энэ байдал төдийлөн дээрдэхгүй гэдгийг үйлдвэрлэгчид онцлон хэлж байгаа юм.

Хэдийгээр “Toyota” дэлхийн хэмжээнд борлуулалтаараа тэргүүлсэн ч 2008 онд борлуулалт дөрвөн хувиар буурсан бөгөөд энэ санхүүгийн жилд алдагдал амсах төлөвтэй байгаагаа мэдэгдсэн. Анх байгуулагдсан цагаас хойш тус компани анх удаагаа алдагдал амсах гэж буй нь энэ ажээ.

SOURCE: news.mn

Toyota 2000 SR Concept загварын машины хөдөлгүүр нь V6 загварын 3,5 литрийн багтаамжтай 610 морины хүчтэй, хурдны хайрцаг нь 6 шатлалтай автомат аж.

I-Real загвар нь карбонон корпус, рулийг орлох тохойн дор байрлалтай удирдлагын товчлууртай, цагт 30 километр хурдлах бөгөөд суугаагаараа жолоодох боломжтой юм.

SOURCE: setguul.mn